Gulvang u İtiqatê Kırmancu

Gulvang u İtiqatê Kırmancu

No tiya, xo bıwane!

Ali Dikme, 2023
Editör: Zeynem Arslan
368 Sayfa
ISBN 978-3-901600-59-3

PDF Açık Erişim Linki

Ez çê Tikmê Gole rawu. Mara Çê Tikmê Areyizu vanê. Khalıkê mı Ferat, piyê dey Mıstefa, piyê dey Usıvo. O ki lazê Tikmiyo. Namê piyê mı Xıdıro; Xıdırê Ferati. Ez lazê Xıdıriyune; Ali Dikme. Tikme, woxt de herfu ra vuriyo, biyo Dikmen. Tayê ki herfi oncia vuriyê, kerdo Dikme. O dewr de kes cırê wayir nêvejiyo. Eve yi herfu ra namey vuriyê, hêni mendo. Ma dewrê de ameyme Estamol. Uza serrê mı pil bi, ez mektev nêguretune. Hem Tırki nêzonen, hem ki serrê mı pilê. Peyniye de lazê apê mı Heyder bi. Ez nıfısa deyra diyune mektev. Mı çor serri uza wend. Serra phoncine peyser ameyme welat. Ameyme hima pi u khalıkê xo. Serra phoncine Mezar de [Vılê Mezar] şiyune mektev. Mı namê Heyderi ra mektev xelesna. Diplomê mektevi danê ma. Mı malımi de qesey kerd. Mı va “hal u hêkatê mı nianêno. Heyder namê mı niyo. Nıka sıma ke namê Heyderi [Haydar] ra [na diploma] da mı, thowayrê mırê nêbeno.” Malımi vake: “Gereke tı şêrê Pılemoriye. Uza mudıri de qesey bıkerê.” Şiyune mı mudıri de qesey kerd. Mı va: “hal u hêkat niaro.” Ey mırê mektuve nusnê. Mı a mektuve arde, dê ve malımi. Malımi namê mı diplome de Ali nusna. Jêde sarê sıma medajni. Wendisê mıno ke esto, nawo. Ney ra têpia çiyo ke mı kerdo; zof kıtavi
wendê. Jü ki kultur u itıqatê xorê wayirêni kerda.

“Çê Tikmê Areyizu” wayirê Jiarê. Zofê Cem u Cemati diyê. Zofê gunekari dardê we, nê ro. Khalıkê ma aşiri ardê hurê. Nıka Jiara xo Pılemoriye dera. Jiara pi u khalıkê mawa. Heq lazê api Uşêni ser de perr racêro, Uşên cırê wayirêni keno. Heq a xızmeta dey qewul kero. Zof xızmeta xo yi ewlay rê biya. Ma ki Cem u Cematu de bime. No itiqatê Pir, Rayver, Mursid u Talıviyo. Peyê Pırdê Suri ra têpia, “Saldağ” yeno. Uza ra dot, “Mezar”o. Uza ra dot Denzek. Serêniya Denzeki de Gola çê Tikmiya. Gole, dı malawa; mala [tağa] bınêne, mala serêne. Jêde, hêgayê xo zengen ra kıninê. Awa xo çina. Çayırê xo çinê. Dilıgê xo mal u mêsın ra nanê ro. Jêde ciamordi qurvete derê. Weşiya xo sayê ke jindan de ramenê. Oncia ki kemera pi u khalıkê mawa. Heq yi jiar u diyarunê mara raji vo. Ma xorê sayiya dinu ra uza mendime. Wertê verg u hesu bi. Wertê morr u mılawunu bi. Zımıstanê xo zof gıran bi. Ez na cawo nianên de bine. Maya mı ez uza ardune homete. Çıqa ke xırav vo, cayê pi u khalıkunê mawo. No ez bine. Nıka ez xo nusnen. Tı ki mıra bestnayiya. Ma xo nusneme. No tiya, xo bıwane. Kultur u itıqat u resmê lesa sımawo. Sıma ke o wend, zerê her pelge de xo vênenê. Kulturê sıma zerrê na pelgu de nuşino. İtıqatê sıma zerê itay dero. Ez van ke, hondê ke destebera mı amê, nu kıtav de sımarê kulturê ma bınusni. Çıturi nusnen? Mı ke pi u khalıkê xora çı diyo, sımarê ey nusnen.