RUEŞON

   Ruecê biyeyiş mara heton ınkê tım o tım ma pey êyni çiyona bi pil. Çond ruec rueşona ver idarê kom holıb kıncon newon gen, labeli komıg quwwet yin çinıyeb nêşken yow şıker zi bıgir. Ma cueka vonki quwwet komıg est, wa derdomerey xur yardım bıkır, wa dest berzır cı. Eg rueşon ben wa herkesır rueşonıb. Yow teni kêf bıkır , eyi bin bon cıra,  pê bıdecır ını hol yow çi nu.  Biyerên ma bınê şı waxt verinon.

    Yow ruec Reşona ver hêla bin şond ma kıncon xu , solon xu vêr balışnê xu nên ru, eya şo pê ğeyalona ma kotên ra. Weyon o bırayon ma piya qalkerdên semed sêrsıbeya. Kom şen ça şıkeron donari, kom şen kom kiyê, sersıbey çınê yen werdış.Inı zaf yow keyfo weş  bı. Pê nımac sersıbeya çıle kiyi ben a, ruec semed maya ınkey destpêkerdeni.  Qêrqêra mayon maya; dı wırzên dı wırzên, şar ınkê comi ra vıciyen. Pê qêri u wêri ya ma piyeru ameni yow heta.  Hama çim teynon  anıbu. Zerê kiyi dı komıg bırayo pil, nımaca pê piyeru şeni ica sıpare xu kêrdeni. O kiyi baklava, küftê, gueşt, dolmı ,lüelê zerri vıraziyên u eya seat dı ını çi amên werdış. Heto bin dı ma hama çım xu anêkerd, şar yow dınya çiy wierd. Piyeru o kiyi dı rueşon yobin kên bımbarek. Eya pey piyeru ica ra bên wıla. Heto bin dı ma xu hêdrê kêrdên. Herê herê yow qıc amên, yow qıc şin. Rey rey zi sê yow keflê qıcon amên u vatên: şıker şıkeerrr😊keyf qıcon zaf weş bı. Werê mı ey ruecon. Eg şıma mara pers bıkır ma qıymêt ey ruecon zona, now nızona? Ez vona ma hendê xu ,guerê quwwêt xu zona.

   Ruece reşon ma tor umbazona toron xu guretên u şin kiyon şıker aridêni. Ma tey mehlon cuyayiş xu dı newi vinên. Inı gurê zaf weş mı şin. Cayo newe vineyiş, riyero newera şiyeyiş tım o tım wêş mı şu. Sersıbeyra heton nımruêca pê ma koten miyon dow, torê xu ma kêrdeni pır. Bacê tor qıcona şıkeron xu ma bar kerdên i u şini kiyı umarıtên. Eg miyon ma dı kom zaf şiker aridab tewr jiyat ow bı.

   Waxtıg şond diyen ma pilon xu ra kom nêdib şo şin vinên, Eya şoyê rueşon tey qıc amên dên berır. Yow tenê bên dapir yow tene zi beni kalık. Namê ınon dapir u kalık bı. Tewr zaf semêd ınıya ma şoyê rueşon şini miyon dow.  Kiyê ma dow ra dur bı, o semed ra ona şênayi nêreseyn cê maya. Dapir u kalık dêron vatên u  keykerdên. Inı zaf weş ma  şini u ma heton pêni yin têmaşe kêrdeni. Pê yina ma zaf wiyên.  Bacê  her kiye guerê quwwet xu no şıker no zi peron dên dapir u kalık. Waxtıg bin şo u tari ma piyeru bin vıla u şini kiyon xu. Ruecê ma pê keyf u şênayi kerema qıdên. Werê mi ey ruecon.